1. epitafium Cuiusdam domine nomine Iulia
Iulia que tenuit summe pulcredinis omnem
Militiam iacet hic in corpore nempe sepulta.
Pars anime sed sancta sue super ethera sede
Gaudet in astrigera, qua venerat alma, sed omnis
5
Nos lacrimis miseros et luctibus ipsa reliquit.
2. epitafium domini Nicole de Vzano
Generalis Ordinis Camaldulensis
Vzana de stirpe satus cum clericus esset,
Niccolus in seclo, monacum Camaldolus Ordo
Ieronimum fecit. Florentia patria. clausum
Dum tenet hic generalis ab ordine factus.
5
Ad patriam corpus animam sed reddidit astris.
Ter centum noviesque decem cum mille sub annis
Vigesima terna decessit luce Novembris.
Hic sua busta latent; melior pars astra recepit.
3.
Dux cultor morumque decus lux gloria legum
Hic dominus Nicola Lapi sua busta reliquit.
Mundo fama viret; celo mens alma quiescit.